Miramón A21

Erabilera: Bulegoak.

Kokapena: Mikeletegi pasealekua 73.

Miramongo Teknologi Parkea. Donostia.

Azalera: 8.300 m²

Sustatzailea: Gipuzkoako Zientzia eta Teknologia Parkea.

Miramongo teknologia-parkeko bulego-eraikin baterako ideia-lehiaketan aurkeztutako proposamena. Iñigo Peñalba eta Aritz Díez Oronoz arkitektoekin elkarlanean egin zen.

Irtenbideak, azken emaitzan, azaleren aprobetxamendu onena eta kalitate espazial eta arkitektoniko handia lortu nahi zituen; horregatik, eraikinaren erabilerak patio estali baten inguruan banatzea planteatu zen, jarduera guztiak antolatu eta uztartzeko (ekoizpen, harreman eta atsedenerako) eta zirkulazio orokorrak biltzeko (korridoreak, eskailerak eta igogailua), eraikineko solairu guztien artean komunikazio bisual eta espaziala erdietsita.

Era horretan, patioa bihurtu zen ideia-sortzailea, proiektatutako proposamena ardazten zuen grabitate-zentroa.

Kanpotik ikusita, prisma biribildu bat, ertzik gabea, egokitzen zen lurzatiaren formara eta aldameneko eraikinetara, irakurketa bertikaleko inguratzaile abstraktu baten bidez (errezel-horma), erritmo eta modulazio uniformeekin.

Emaitzazko bolumena hormigoizko zokalo baten gainean bermatzen zen, eta haren fatxadak definitzen zituen beirazko azala «flotatzen» bezala gelditzen zen. Multzoak arintasun formal handia eta grabitaterik eza lortzen zuen horri esker.